Die VIP teater was vol moed met 5 brawe skrywers/kykers wat die nuwe fliek “GRETA” gaan kyk het om hul opinies en resensies te skryf. Die film se advertensie stel geen verwarring nie en verkondig duidelik dat jy jou gereed moet hou vir ʼn reuse spanningsverhaal.
Die ligte gaan af en die vertrek is pikdonker. My reeds gespanne kollega sit langs my en al wat ek kan hoor is sy vrees vir die onwetend.
Die Fliek:
Die rolprent begin soos enige ander spanningsrolprent...heel onskuldig. 'n Meisie stap uit by ʼn treinstasie en sien ʼn verlore handsak. Sy loer vir besonderhede en sien, wonder-bo-wonder dat daar ʼn naam en adres op is. Sy vat die tas na die persoon en ontmoet toe daar 'n onskuldige ouer dame “Greta”. Dis die deel waar jy al begin hoendervleis kry...
Heel ironies, begin daar ‘n verhouding tussen die jong dame en ʼn ouer vrou ontwikkel. Dit is op die oog af ‘n bloot onskuldige vriendskap. Die twee raak sulke goeie vriende dat die jong dame sekere geleenthede saam ander van haar ouderdom afstel om by "Greta" te kuier. Tot een onverwagse oomblik waar die jong dame 'n baie groot geheim van Greta, per ongeluk, ontdek. So geskok oor die onverwagde geheim verskoon sy haarself bleek-bleek van die ete wat hulle sou gehad het.
Die storie se spanning en vrees begin daar onder jou vel in te klim soos die jong dame probeer om haar “ou” vriendin te vermy en dié daag net op om elke hoek en draai. Waar die arme meisie beweeg is die vrou op haar spoor.
Uiteindelik is daar verligting toe die jong dame, half getraumatiseerd, die ouer vrou konfronteer oor haar kompulsiewe gedrag en dreig dat sy haar by die polisie gaan aangee. Die ouer vrou probeer haar saak stel deur te verduidelik en dit lyk uiteindelik asof die verhouding daar gaan eindig. Beide loop weg en dit is nou die einde van die verhouding... maar die storie bereik nuwe hoogtes soos “Greta” dinge vat tot ʼn totale nuwe vlak waar sy jou los op die punt van jou stoel met jou naels in jou tande, besig om die senuwees wat jy nog oor het op te vreet.
Die rolprent verras jou met ‘n einde wat mens nie noodwendig sou verwag nie.
Wat jy dalk moet weet:
Vir die persone wat kom uit ʼn agtergrond van obsessie en mishandeling kan dit dalk weer ʼn paar ou geraamtes uit die kas laat kom, maar dit kan jou ook herinner aan jou eie krag en oorwinning. Jy gaan net moet bly kyk tot die einde en moet liefs nie in die middel uitloop nie, want die beste kom nog.
Persone wat sensitief is vir godslastering, ja, daar is so een of twee keer waar jy dalk jou ore gaan moet toedruk, maar dit is glad nie volop of oorweldigend nie. As jy daarby verby kan kyk sal die effek daarvan vinnig verdamp in die spanning van die opvolgende tonele.
Dit is altyd lekker om te noem dat daar geen naak tonele, misbruik van dwelms en allerhande vreemde dinge is nie.
Daar is bloed in die storie maar dit is nie ʼn gespat en vloei van liters bloed nie. Dit is redelik tot die realiteit beperk. Om die minste te sê, ek wat glad nie van bloed hou nie, kon dit hanteer, so jy behoort ook te kan.
Daar is baie onverwagse tonele waar jy gaan skrik, so maak jou gereed vir baie van dit!
Die Rolprent se Boodskap:
Aan die einde van die rolprent was ek taamlik geraak deur die boodskap wat die rolprent gelos het. Mens sou dink die rolprent is daar om jou op ʼn wipplank van spanning en vrees te sit, maar eintlik is dit die teenoorgestelde. Regdeur die rolprent word jy herinner: Hou aan veg vir wat jy glo. Moet nooit oorgee of opgee nie. Jy as mens is sterker as wat jy dink. Wanneer jy in ʼn hopelose situasie is sal liefde altyd-ALTYD seker maak dat jy daar uitkom.
GRETA en Inspirasie
Die film weerspieël ʼn gedeelte van elke mens se lewe. Soms is daar idees, gedagtes, begeertes of selfs geleenthede wat ons pad kruis. Ons neem dit aan en aanvaar dit, want dit lyk onskuldig. Iewers in die pad kom ons agter dat ons verwagting nie ooreenstem met die realiteite nie en dan wil ons wegkom van die situasie of van die gevoelens af weg beweeg. Dit is daar waar dit ons begin jaag en meeste van ons gevang word in vrees en spanning, want die uiteinde lyk so onmoontlik.
Dan, wanneer ons besef die lewe gaan oor liefde, sal ons vinnig agterkom dat liefde nooit opgee nie. Dit is juis dit wat ons deur die moeilikste omstandighede trek en ons aan die ander kant weer heel maak.
Liefde is alles, liefde wen alles, liefde oorkom alles. Daar is geen vrees in liefde nie!
Vrede vir altyd
FC NORTJE
Liefde is alles, liefde wen alles, liefde oorkom alles. Daar is geen vrees in liefde nie!
Vrede vir altyd
FC NORTJE
NASIEINSPIRASIE
Opmerkings
Plaas 'n opmerking