Nommer 37

“Wanneer ’n fliek se naam NOMMER 37 is en in ’n fiktiewe area van die Kaapse Vlaktes afspeel, is dit maklik om aan te neem dat dit oor bendes gaan – maar dit doen nie. Dit is deur-en-deur ’n misdaadriller wat elke oomblik meer spanningsvol raak. Dit gaan oor alles wat vir ’n paartjie kan skeefloop wanneer depressie, nuuskierigheid, gierigheid, vrees en slegte keuses saamgegooi word,” sê regisseur en skrywer Nosipho Dumisa.

NOMMER 37 is ’n spanningsbelaaide grootskerm-ervaring, wat kykers op die punte van hulle stoele sal hou tot en met die laaste toneel. 

Die rolprent is vervaardig deur Gambit Films in samewerking met kykNET Films, M-Net, XYZ Films en Die Departement van Handel en Nywerheid (DTI). Dit word plaaslik, op 1 Junie 2018, vrygestel deur Ster-Kinekor Entertainment en sal ook internasionaal versprei word deur XYZ Films. - Starburst Promotions

NasieInspirasie het gaan uitvind wat was Ephraim Gordon en Monique Rockman se ervaring op die stel van Nommer 37.

Ephraim Gordon, foto: Lindsey Appolis

1. Vertel ons lesers meer van jouself en die rol wat jy speel in 

Nommer 37?

Ek is Ephraim Gordon, en ek speel die rol van Warren in Nommer 37.
Vir die afgelope paar jaar het ek verskeie rolle in die film, televisie en teater wêreld gevul. Tans werk ek as Regisseur op die gewilde kykNET Sepie, Suidooster, en het voorheen ook die Rolverdeling daar behartig. Die laaste twee jaar was baie opwindend in die sin dat ek saam met my Besigheidsvenoot en vriendin Amy Jephta, die kort-film Soldaat vir die kykNET Silwerskermfees vervaardig het en twee pryse onder andere Beste Kort-Film gewen het. 

Soldaat is tans op SHOWMAX te sien.

In my hart is ek 'n "theatre boy", en die laaste twee jaar het ek die geleentheid gehad om weer so bietjie op die planke te baljaar in Die Dans Van Die Watermeid. Die stuk het laas jaar 'n speelvlak by die Baxter Teater geniet, sowel as by hierdie jaar se KKNK en US Woordfees. Ek is regtig baie bevoorreg om met mense te werk wie werklik vir my geleenthede skep om al my vaardighede ten toon te stel en konstant te beoefen.

2. Wat van jou ervaring as akteur in hierdie film het vir jou die meeste uitgestaan?

Wat vir my as Akteur die meeste uitgestaan het van die proses was die feit dat ek saam met so baie jong, kreatiewe siele iets so mooi soos Nommer 37 in die lewe kon roep. Dit was regtig 'n spesiale belewenis om met van my beste vriende te kan werk.

3. Wie was die ‘grap-gat’ op stel en wie het jou geinspireer?

Luke Jansen, wie die karakter van 'Spook' vertolk, was definitief die grapjas. Soos ek hom oor die jare leer ken het, ken sy sin vir humor geen perke nie.
My grootse inspirasie was definitief Monique Rockman, wie die skoene van 'Pam', so mooi volgestaan het. Maar wie ook deur 'n pynvolle besering gedurende 'n "stunt scene", aangehou het om haar beste te gee om haar karakter met soveel integriteit te speel.

4. Hoe belangrik, dink jy, is dit vir mense om hul passie uit te leef?

Passie gee betekenis aan ons lewens. Om jou passie te leef is om jou siel te laai met soveel van daai betekenis. Ek is so dankbaar dat ek elke dag kan opstaan en my passie te kan uitleef, en boonop 'n salaris daarvoor verdien.

5. Watter quote/gesegde/gedagte beteken tans iets vir jou? 

Op die oomblik beteken die volgende quote nogal vir my baie:

"Do what you have to do today, so that you can do what you want to do tomorrow"- Anonymous

Monique Rockman, foto: Lindsey Appolis

1. Vertel ons lesers meer van jouself en die rol wat jy speel in 
Nommer 37?

Monique Rockman, ek speel die rol van Pam, Ismael-Randal se getroue meisie. Pam is baie Lief vir Randal, al verdien hy dit nie altyd nie en al stem sy nie saam met sy besluite nie, staan sy by hom deur dik en dun.

2. Wat van jou ervaring as aktrise in hierdie film het vir jou die meeste uitgestaan?

As Aktrise was dit 'n baie 'amazing experience' om te ervaar die tipe fokus en toewyding wat ons almal ingesit het gedurende die skiet van die film. Almal teenoor wie ek gespeel het, het my en die proses met respek en integriteit behandel. Dit help baie, veral met moeilike of sensitiewe 'scenes'. Ons kon saam lag, saam huil, saam ernstig wees. Dit was die perfekte atmosfeer vir iemand soos ek wat my eerste kans as 'n 'Leading Lady' gekry het.

3. Wie was die ‘grap-gat’ op stel en wie het jou geinspireer?

Ek en Irshaad was meestal saam op stel en ons het half ons eie familie gestig in die 'make-up department' waar ons meestal gehang en gekla en gelag het, tussen 'scenes'. Luke Jansen (Spook) was defnitief die grootste grap-gat. Hy het altyd kaarte stel toe gebring dan sit ons en speel by 'make-up' op die vloer. Almal was eintklik baie lief vir mekaar en ons het een weird familie geword wat moeilik was om van afskeid te neem. Nosipho, ons Director het my geinspireer met haar 'drive' en 'confidence'. Sy is die definisie van 'girl-power' en het my ook na myself as vrou met nuwe oë laat kyk.

4. Watter quote/gesegde/gedagte beteken tans iets vir jou? 

"Never say never, you never know."

'n klein vonk kan 'n groot woud laat brand #nasieinspirasie