photo: Annie Spratt
Ek begin met Lamtietie-Damtietie. Kan nie die Lamtietie-Damtietie deel onthou nie, so vir eers kan ek net onthou vanaf 'luister hoe fluister die wind deur die boompetjies' en vir seker 'n goeie halfuur draai die liedjie deur my kop en probeer ek allerhande woorde insit en deuntjies maak om die hele ding te sing. Raak baie vies vir myself, eerstens omdat ek nie kan slaap nie en tweedens, omdat my ma dit destyds vir my gesing het en ek dit baie dikwels vir my tweetjies gesing het, maar ek is nou al oor die sestig en die seuns reeds altwee lummels van oor die dertig.
Toe ek besef die eerste stuk van Lamtietie-Damtietie is vir eers geblok, slaan ek oor na Slaap Pikaninie. En dadelik dink ek hoe arme Boris Johnson nou die dag in die media oor die kole getrek is omdat hy gewaag het om die woord 'pikaninie' in 'n koerantartikel te gebruik. Toe vervies ek my eers vir die "Politically Correct" twak wat die mensdom hier in Engeland so aan die neus lei.
Maar ek woed voort. Slaan oor na Schlafe mein Prinzchen schlaf ein wat ons in die laerskool in die koor gesing het. Dié gaan goed vir so die eerste 4 reëls en verder is dit toe net mm mm mm mm mm mm mmmmmmm... Die wysie is nog daar, maar die woorde is totaal weg. Ek wou nog begin met Tula tula tu tula baba tula sana, maar dieselfde ding – die deuntjie is nog daar, maar die woorde lankal nie meer nie.
Toe begin ek wonder oor slaapliedjies in die algemeen. Ek wonder of jong ma's nog vir hulle kinders slaapliedjies sing. Ek wonder wat sing hulle deesdae? Met die wêreld wat nou so vol geraas is, kan ek half nie dink dat die jongklomp nog die ou liedjies onthou nie.
En so in die donker nag, met my toe oë, kyk ek af na die baba in my arms en sing vir Lamtietie-Damtietie sonder 'n probleem van begin tot einde. En ek dink hoe vol deernis die woorde is en hoe vol deernis mens voel as jy na daai ogies kyk wat stadig toeval soos die slaap oorvat.
Met Lamtietie-Damtietie weer OK en my kop nou wawyd wakker, begin ek dink aan spesifieke woorde.
Die eerste woord wat my besig hou is 'vark'. Die woord klink soos 'n vark. Sê die woord en dink aan hoe 'n vark lyk en klink en jy sien hom daar staan - van pienk snoet tot krul stert. Padvark – goeie uitskelwoord. Vlakvark - stert in die lug.
En 'gaap'. Ons Afrikaners gaap so met oorgawe. Die woord beskryf die hele aksie: Die gaap begin met die 'g' en dan rek jou mond so wyd as moontlik oop, tot jou oë toeknyp en jou ore oopslaan en jou hand vanself op beweeg sodat jou medemens nie al jou stopsels hoef te sien nie. Net om die woord te sê, is genoeg om 'n gaap te insinueer. (Ek het so pas gegaap...) Dankie tog ons hoef nie te 'Yawn' nie. Die woord 'Yawn' beskryf die hele verskil tussen ons Afrikaners en die Engelse. 'Yawn' klink so na 'n erg onderdrukte gaap. 'n 'Yawn' bereik nooit die oë nie. Jou mond bly in 'n 'ô'. Uptight.
'n 'Yawn' klink na 'n "Politically Correct" Gaap.
'Malbaaroor'. Ek weet my ma het die een of ander kraakbeen in die kos 'n malbaaroor genoem. Ek het dit vanoggend probeer Google, maar dit lewer niks op nie. Ek wonder of my ma die woord opgemaak het en waar sou sy daaraan gekom het...?
En so het dit aangegaan vir ure totdat ek uiteindelik êrens na twee uiteindelik ingedommel het.
(Luister gerus na Lamtietie Damtietie soos gesing deur Marthie Nel Hauptfleisch: https://youtu.be/4Ke671iURhw) #womanonfire
'Malbaaroor'. Ek weet my ma het die een of ander kraakbeen in die kos 'n malbaaroor genoem. Ek het dit vanoggend probeer Google, maar dit lewer niks op nie. Ek wonder of my ma die woord opgemaak het en waar sou sy daaraan gekom het...?
En so het dit aangegaan vir ure totdat ek uiteindelik êrens na twee uiteindelik ingedommel het.
Geskryf deur Annettte Garside
(Annette is 'n Suid-Afrikaner woonagtig in Darlington, Engeland).(Luister gerus na Lamtietie Damtietie soos gesing deur Marthie Nel Hauptfleisch: https://youtu.be/4Ke671iURhw) #womanonfire
'n klein vonk kan 'n groot woud laat brand #nasieinspirasie
Opmerkings
Plaas 'n opmerking