Kaleidoskoop

KALEIDOSKOOP ALBUM LAUNCH: GUNSTELING SEISOEN

Vandag wil ek net so bietjie "gush" soos ʼn objektiewe joernalis nie eintlik mag nie, want hierdie mense kry dit reg om my weer trots te maak op Suid-Afrikaanse kuns. Kaleidoskoop het verlede naweek hul splinternuwe album, Gunsteling Seisoen, by die Atterbury Teater in Pretoria bekendgestel, en die werk wat in die laaste vyf jaar ingesit is, kan duidelik gesien word.

Jouba Jordaan en Anique Jordaan (al deel hulle ’n van, is hulle nie familie of getroud nie) sing sedert 2009 saam, en wanneer hierdie twee hul monde oopmaak, praat twee talentvolle stemme saam as een. Hierdie sal ook die groep se eerste album wees sedert Vars Uitgekerf in 2012 vrygestel is. Anique het tydens die opvoering genoem dat daar baie tyd en beplanning in die produksie van elke liedjie ingaan, omdat hulle rekeningskap sal moet gee vir elke woord wat uit hul monde kom. Geloof speel ’n belangrike rol in die skep van Kaleidoskoop se musiek, en dit is duidelik sigbaar in die algehele manier waarop hulle ’n vertoning aanbied.

“Ek dink dit is die natuurskoon wat ons baie inspireer, en dis natuurlik iets wat die Here gemaak het, so indirek is dit ook Hy wat ons inspireer,” het Jouba tydens ’n onderhoud na die vertoning gesê.

Hulle het met dié album weer teruggekeer na die akoestiese klank waarmee Kaleidoskoop bekend geraak het. Anique het genoem dat hul heelwat geleer het in die vyf jaar tussen die vorige album en hierdie een, terwyl dit ook beteken het dat hul baie meer insette kon lewer tydens die produksieproses. “Die klank (van hierdie album) is ook baie meer volwasse, en ek dink dis presies wat ons wou hê,” het sy gesê.

Die primêre tema’s van Gunsteling Seisoen word beskryf as vergifnis en versoening, terwyl die meer hartseer seisoene van die lewe dié keer ook aangeraak word. Anique het gesê dat die boodskap wat hul graag deur dié album aan hul luisteraars wil kommunikeer, is om na die goeie dinge in die lewe te bly kyk, al is jou omstandighede nie noodwendig gunstig nie. “Dit is ’n stappie nader aan die genesing van ons land,” het Jouba gesê.

Jason Ferreira, een van Kaleidoskoop se musikante, het genoem dat hierdie album meer lewendige instrumente gebruik as voorheen. Hy beskryf die band as net ’n klomp vriende wat saam musiek maak. Daarby is dit duidelik dat die twee Jordaans musiek maak saam met mense wat ware kenners is van hul instrumente. Verskeie kitare, ʼn ukulele, mandolien, glockenspiel, trekklavier, stryk-kwartet, klavier, baskitare, perkussie en ʼn banjo word inkorporeer om die Kaleidoskoop se unieke klank ʼn baie vars element te gee.

Gunsteling Seisoen het ’n egtheid wat kom vanuit ’n plek waar die skep van musiek as ’n leefstyl beskou word, en die manier waarop dit aangebied word, wys dit. Daar word niks weggesteek nie, en die algehele indruk is "effortless".

Tans is die album net op die band se nuwe webtuiste beskikbaar, by www.kaleidomusiek.co.za. Dit sal egter binnekort op iTunes te koop wees.

Kyk die enkelsnit van die album, Wegbreek, se musiekvideo hier: https://www.youtube.com/watch?v=U-h1DmU8zNM

geskryf deur Johané van den Berg