‘n Versameling is ʼn groep dinge, elemente, simbole, wat volgens ʼn gekose definisie bymekaar behoort. My slotsom ten opsigte van hierdie definisie is, om die waarde van enige iets te bepaal nodig jy ʼn punt van verwysing. Wat beteken, jy is wat jy is, ten opsigte van iets anders. Nou, om enige iets op te weeg met iets anders is geen aanduiding van waarde nie, maar meer ʼn aanduiding van die verskil in eienskappe. Dit is die verskil in eienskappe wat ons definieer ten opsigte van die verwysingspunt en slegs deur die aanwending van ons eienskappe word ons waarde bepaal.
Dit beteken alles het waarde ten opsigte van mekaar, maak nie saak tot watter versameling jy behoort nie.
By "Expression Sessions" in George sê ons altyd: ’Everybody wants to be a star, welcome to the galaxy!’ Die filosofie agter hierdie stelling is dat ons almal sterre is en almal ʼn plekkie het in die hemelruim. So ons almal het die kapasiteit om te skyn, want ons almal is gebôre met ietsie spesiaal. Nou hierdie ietsie spesiaal moet ontgin, verwerk en vertroetel word. Hierdie ietsie het toegeweide aandag nodig om tot volle potensiaal te groei. Hierdie ietsie spesiaal verwys gewoonlik na ons talent.
Baie mense het al vir my gesê ek het vele talente. Ek het gesit en bepeins daaroor, toe ek besef, ek het egter net een talent en hierdie een talent bestaan uit ʼn verskeidenheid van vaardighede. Hoekom sê ek so? Wel, die karakter Hundred Eyes, ʼn Shoalin priester in die televisie reeks Marco Polo, het Kung-Fu gedefinieer en my ʼn beter perspektief gegee oor wat talent is.
Ek het altyd gedink Kung-Fu verwys na die oosterse vegkunste, maar volgens Hundred Eyes beteken Kung-Fu: Dominance through supreme skill of Oorheersing deur onge-ewenaarde vaardigheid.
Hy wys uit dat ʼn kunstenaar, 'n beeldhouer, ʼn rekenmeester of selfs ʼn ystersmid met buitengewone vernuf en onge-ewenaarde vaardighede, Kung-Fu beoefen, en as ek kyk na wêreld-rugby, sou ek sê die All Blacks beoefen Kung-Fu. Hundred Eyes sê ook : ‘To master Kung-Fu requires practice, preparation and endless repetition. Om Kung-Fu te bemeester benodig oefening, voorbereiding en onophoudelike herhaling. En met dit het ek besef, talent is die produk van vernuf en vaardighede, en die somtotaal van toewyding, want wat jy insit is wat jy uitkry.
Nou as jy buitengewone talent het moet jy besef dit kom met verantwoordelikheid. Verantwoordelikheid moet bestaan uit ʼn kombinasie van informasie, kennis en wysheid. In die moderne wêreld van informasie tegnologie is almal deesdae ʼn genius en te veel mense beskou informasie as kennis en dus waar die pot mis gesit word. Informasie is net wat dit is, Informasie, en niks meer nie. Informasie raak egter net kennis as dit suksesvol kan toegepas word en kennis raak slegs wysheid as dit aangewend word ten bate van almal. Ek sê in een van my liedjies: If you are good at something never do it for free but do it to free your people! En as jy jou Godgegewe talent aanwend om die wêreld ʼn beter plek te maak, is dit die grootste vorm van dankbaarheid wat jy kan betoon aan die Almagtige vir hierdie seëning wat Hy jou gegun het, en dan eers kan jy erkenning verwag vir jou talent.
So laat ons skouer aan die wiel sit, talente ontgin en groei met waardes wat voldoen aan kennis en wysheid, sodat die hemelruim besprinkel word met sterretjies wat skyn, skyn, skyn…
Meer oor Hakkiesdraad Hartman
Opmerkings
Plaas 'n opmerking