Meer oor sy vlamvattende inspirasie en wat hom aan die brand hou...
’n Deeglike sin vir humor. Dit is die eerste ding wat mens van Len Muller optel, en dit het hom ongetwyfeld goed gedien in die oploop voor sy sukses. Hierdie selfde jong man was eens op ’n tyd die outjie wat by die plaatemaatskappye koffie aangedra en CD's reggepak het, nie die een wat in die ateljee opgeneem word nie. Tydens die bekendstelling van sy nuwe CD vertel hy ’n paar oulike staaltjies en het 'n gemaklike interaksie met sy media-gehoor tussen liedjies. Hy noem vir Laurika Rauch “Tannie”, en sy verwerking van haar “Gange” laat my van voor af verlang na kinderdae op die plaas.
Tydens ons onderhoud op Industrial Coffee Works se lang, hout tafels lag hy maklik en gereeld.
1. Hoe verskil die persoon wie jy vandag is met die jong man wat destyds van Richardsbaai af hier aangekom het en begin het deur die vloere te vee en kaste reg te pak om net ’n voet in die deur te kry...?
Ek was ’n persoon wat baie honger was om te leer. Kyk, as jy grootword sonder ’n mentor, sonder ’n pa, is dit moeilik om jou passies te ontdek. Iets wat ek intussen geleer het is dat dit belangrik is om jouself met mense te omring na wie jy kan opkyk, mense wat dit doen wat jy graag wil doen en by hulle te leer. Toe ek net hier aangekom het, het ek vir ‘n jaar lank net CD's gepak by ’n plaatemaatskappy. Ek het ’n paar maande verniet gewerk vir een van die grootste musiekbestuurders in ons land sodat ek kan leer hoe die besigheid werk. Toe het ek verniet opgetree as voorskou vir ouens soos Jak de Priester, Chris Chameleon, mense na wie ek so opkyk. Ek het op ’n stadium uit die bloute vir Stef Bos ge-epos, ek het so baie respek vir sy musiek. Nou werk ek saam party van hulle. Niks gebeur as jy nie uitgaan en dit gaan soek nie.
2. Waarvoor is “Len” kort?
Lenderd. Dis ou Duits. Ek gaan nie al my name vir jou sê nie (lag) maar mense noem my ook Lennie.
3. Hoe sal jy jou musiek beskryf?
Ek weet nie of dit ’n Anglisisme is nie, maar ek hou van die woord “substansie”. As ek ’n liedjie luister en dit ontlok emosie in my hart en ek kan myself daarmee vereenselwig, selfs as dit nie op die noot is nie, dít is vir my die mooiste musiek. As ek dit kan regkry, is ek baie dankbaar.
4. Waarvoor wil jy bekend wees? Die een ding waarmee mense jou moet assosieer?
Ek sal wil bekend staan vir iemand wat opreg is. Iemand wat nie voorgee om iets te wees wat hy nie is nie. Dis vandag so skaars, veral in die Afrikaanse musiekbedryf. Die mens wie ek agter die skerms is, moet dieselfde mens wees wie ek op die verhoog is.
5. Jy en jou vrou het saam Sterrewals geskryf. Hoe sou jy daardie ervaring beskryf?
Wel, sy is fantasties, sy kan enigiets doen en is baie beter as ek met spelling! (lag). Ons het ontmoet by een van my shows en sy het geresonate met een van my liedjies, so ek weet sy kop dit wat ek skryf. My vrou verstaan my hart so mooi en sy is self ’n skrywer, so dit kon nie beter wees om saam met haar te skryf nie.
5. Persoonlike vraag: Kleur jy jou hare?
Ja, definitief (lag). Kyk, ek het nog nie grys hare nie, maar ek het bekend geraak met die blonde hare en vandat ek van die see af weggetrek het, lyk dit nie meer natuurlik so nie. Toe bied ’n vriend aan om my stylist te wees en eendag sê hy vir my hy gaan dit nou kleur. So dis die storie.
6. Vir watter nasionale rugbyspan skree jy?
Natal Sharks. Ek is ’n volbloed Nataller.
7. Watter advies het jy vir aspirant-musikante?
Stap 1: vind uit of dit regtig jou roeping is. Daar is baie mense wat kan sing, maar jy moet genuine weet dat dit is wat jy moet doen. As dit regtig in jou hart klop, as jy nie kan wegkom daarvan nie, go for it.
Stap 2: harde werk en opofferings (lag).
8. Wat steek jou hart aan die brand?
Liefde. Dis iets wat in my brand, wat my aan die gang hou, en as mense liefde vir mekaar begin kry, oor kulture, oor grense, kan dit regtig ’n ander plek wees. Dis waaroor dit vir my gaan.
Volg #NasieInspirasie
Facebook: NasieInspirasie/NationInspiration
Instagram: @iskra_music
Twitter: @iskra
#NasieInspirasie se hart klop om sleepvoet-dromers te inspireer.
Waardeer jou eie uniekheid, gebruik jou talente en natuurlike gawes.
“‘n Klein vonk kan ‘n groot woud laat brand.”
#nasieinspirasie
Opmerkings
Plaas 'n opmerking