Bakgat se Top Tips en Truuks

Ek het dit goed gedink om hierdie keer so paar idees met julle te deel om net die bakproses bietjie makliker te maak vir julle.

# Tip 1
Dit gebeur soms met my dat ek op die nippertjie ‘n koek of cupcakes moet bak vir ‘n bestelling, of ek wil sommer net vinnig ‘n vriendin bederf wat oorkom vir koffie. Ek besef ek het geen eiers nie!!! Gaan ek nou eers alles los en winkel toe ry en dan laat wees vir die afspraak of miskien is ek net nie lus om gou eiers te gaan koop nie? (Julle moet weet somtyds is ek wit van die meel terwyl ek in my kombuis woeker). So, al wat jy doen is om vir elke eier in jou resep net ‘n groot opgehoopte eetlepel mayonaise in te sit. Mayo is basies mos maar net melk, eiers en asyn. Alles wat jou resep net sagter en meer donsig kan maak. Wanneer jy sjokolade koek bak en jy weet die resep is bietjie droog, gooi sommer ‘n eetlepel of twee mayonaise by om die koek daardie smulsagte tekstuur te gee.


# Tip 2

Het jy nie ‘n eier skeier nie en sukkel jy om die wit van die geel te skei tussen die twee doppe (wat heeltemal skeef gebreek het ook nog) te giet? Breek die eier in jou hand. Die geel sal nie breek nie, want jou hand is lekker sag en jy kan rustig die wit laat deurglip. Dit klink grillerig, maar as jy soos ek soms 9 eiers moet breek vir ‘n koek, gaan dit sommer lekker vinnig. 

# Tip 3

Nogsteeds by die eiers... Breek gerus die eiers een vir een eers in ‘n afsonderlike bakkie, ondersoek dit vir varsheid en wegkruip doppe en gooi dit dan by die beslag. Dit gaan jou baie trane spaar as die 9de eier dalk vrot is en jou hele resep opmors.

# Tip 4

Indien jy koek wil bak en jou spray & cook is klaar, en jy geen waspapier het nie, kan jy ‘n dun lagie margarien of botter in die pan smeer en dan ligtelik koekmeel oor strooi. Die verskil is net in hoe skoon die pan gaan wees na die tyd.

 

Die boonste pan was spray & Cook en onderste pan margarien en meel.

So lyk koeke se onderkant na dit gebak is met Spray & Cook (boonste koek) en margarien en meel (onderste koek).

Silikon panne verkies geen smeermiddels nie. Dit bak perfek net so.

# Tip 5

Iets wat ek eers hierdie Kersfees geleer het (glo my, ek het nog baie om te leer, en deel graag soos ek leer) Daardie dun lagie jellie wat vorm onder in die bak waneer die jellie klaar gestol is, voorkom dit deur eers die bak nat te maak met koue water voor jy jellie poeier ingooi om op te los. I never knew.

# Tip 6

Indien jy nie ‘n sif besit om die droë bestandele van ‘n koek of cupcakes mee te sif nie, gooi alles in ‘n groot bak en klits dit vir paar minute met ‘n ballon klitser. Dit sit die lug in jou bestandele sonder ‘n sif en maak steeds jou koeke veerlig.

Die punt van my artikel is seker net om julle te inspireer om geen verskonings te maak as dit by bak kom nie. Dit is pret, ontspannend en kan mense wat die passie deel, nader bring aan mekaar. Wanneer ek en my ma of vriendinne saam bak, is ons sommer in ‘n lawwe bui en geniet elke oomblik saam.

Indien julle enige handige tips het, comment asseblief. Ek geniet dit om te leer. 

Soet groete,
Charmaine Hurter
Bakgat