Chanté van der Spuy - TAY ART
In Desember 2017 het die 16-jarige Chanté, van Punt Hoërskool, die eerste keer haar kunswerke op facebook geplaas en ‘n golf-goeie-reaksie op haar skilderwerk gekry. Sterk oppad om Medies te studeer nà skool, het dit veroorsaak dat sy haar toekomsplanne her-oorweeg en besluit het om eerder vry-vlerk, met kunskwas, die toekoms in te stap.
“Ons het in Mosselbaai gewoon toe ek klein was, tot en met so 7-jarige ouderdom. Ons het daarna heelwat rondgetrek, maar het weer in Mosselbaai kom woon vanaf 2013, toe ek in Graad 6 was.”
“My ouma, Rina Vos, was ‘n bekende skildernaar, jare gelede”, vertel sy.
"Sy het my van die begin af ingelei, vir my verf in my hande gesit en geleer teken. Sy het die passie in my aangesteek. Ek het ook kreatiewe tydtjies saam met Riëtte (Rut Art) deurgebring toe ek klein was, voordat ons getrek het. Ons het intussen weer kontak gemaak en skilder soms saam.”
Om te teken en te skilder was nog altyd ‘n manier om haar kop skoon te kry, …”nog van die begin af”, sê sy. ‘n Klomp verskillende kunsternaars inspireer haar. “Ek het ‘n hele lang lys van hulle”, lag sy lekker. “Tannie Riëtte (Rut Art) is een van my grootste inspirasies in Mosselbaai en verder is dit meestal oorsese kunstenaars; Ivana Besevic, Elly Smallwood, Colin Davidson, Lionel Smit en ander.”
“Ek dink ek het een keer ‘n blom geverf...” Sy is baie lief daarvoor om eerder ‘Portraits’ (gesigte) te skilder. Dit is haar passie en dit maak haar gelukkig so daarom het sy besluit om kuns te studeer na skool. “Ek het al my skoolvakke ook verander.” Dit nou, om aan haar nuwe droom te bou. As sy uit idees hardloop, kom sy uit die huis uit en vertel van hoe ‘n Antieke/Tweede Handse winkel haar inspirasie weer losgemaak het en haar binnekant laat vlam het. “Klein goedjies kan ‘n mens help...”
“My familie is so, so ondersteunend”, vertel sy, dit is duidelik dat dit vir haar baie beteken. “Ek wil wat binne in my is express, dit gaan vir my minder oor om iets te maak wat ander inspireer. Ek wil gee wat uit my hart uitkom en ander sal iets daaruit kry. Ek sal daarvan hou as mense na my kunswerke kyk en op ‘n manier kan sien dat daar ‘n groot storie agter dit sit.
NasieInspirasie se tema vir die maand is “Diep Spore… Jy kannie diep spore trap as jy nie diep spore volg nie.” Dit gaan oor mentorskap, saawerk en saamgroei…”Hoe belangrik is mentorskap en saamwerk vir jou op hierdie stadium?” vra ek. “Eerlikwaar, dit is vir my amper 90% van die hele ding…Sonder dit sou ek nie geweet het waar om te begin en wat om te doen nie. Veral ook met tannie Riëtte…sy het my so onder haar vlerk ingeneem en my so baie gehelp. Klein goedjies, stukkies raad wat die wêreldse verskil maak. Net om daardie ‘support’ te hê sodat jy nou self op ‘n oop pad moet gaan nie. Mens kan dit self doen, maar jy kan ook vir jouself onnodige werk veroorsaak. Dit is vir my baie belangrik. Mens kan nie maklik iewers kom sonder mekaar nie.”
In ‘n video oproep het ek later met die twee kunstenaars gesels
(Chanté en Riëtte) by ‘n saam-skilder geleentheid ivm ons tema; Diep Spore en mentorskap. Hulle altwee het gelyk, “BAIE!!!” geantwoord en gelag toe ek vra, “Wat het julle bymekaar geleer?”…
Dit het my net weereens laat besef dat alhoewel ons elkeen ons eie pad kies, loop en ons eie, unieke spore los; ons deur saam werk en saam leer mekaar diep kan aanraak en die impak daarvan nie sommer op ‘n ou-stofpad sal wegraak nie.
Riska du Plessis
Geniet hier net so paar van haar pragtige skeppings. Volg haar op sosiale media, facebook/Instagram onder Tay Art #nasieinspirasie
Tay Art ©
Tay Art ©
Opmerkings
Plaas 'n opmerking